லண்டன், மார்ச் 25: தீவிரவாத முகாம்களை அழிக்குமாறு பாகிஸ்தானை அமெரிக்கா, பிரிட்டன் போன்ற நாடுகள் வலியுறுத்தவேண்டும் என்று மத்திய உள்துறை அமைச்சர் ப. சிதம்பரம் கூறினார்.
லண்டன் வந்துள்ள அவர் பிபிசி தொலைக்காட்சிக்கு அளித்த பேட்டி வருமாறு:
பாகிஸ்தானில் அல் காய்தா, லஷ்கர்-இ-தொய்பா போன்ற தீவிரவாத முகாம்கள் இன்னும் செயல்பட்டு வருகின்றன. அங்கிருந்து தீவிரவாதிகளுக்கு பயிற்சி கொடுத்து இந்தியாவுக்குள் ஊடுருவுமாறு கட்டளைகள் பிறப்பிக்கப்பட்டு வருகின்றன.
ஆனால் அந்த முகாம்களை அழிப்பதற்கான முயற்சிகளில் பாகிஸ்தான் அரசு இதுவரை ஈடுபடவில்லை. எனவே அங்குள்ள தீவிரவாத முகாம்களை அழிக்குமாறு பாகிஸ்தானின் நட்பு நாடுகளான அமெரிக்கா, பிரிட்டன் போன்றவை வலியுறுத்தவேண்டும்.
அங்குள்ள முகாம்கள் மூடப்படவேண்டும். அங்கு கொடுக்கப்பட்டு வரும் தீவிரவாத பயிற்சியை முடிவுக்கு வரவேண்டும் என்றார் அவர்.
அதுபோன்ற முயற்சிகளில் பாகிஸ்தான் ஈடுபட்டுள்ளதா என்ற கேள்விக்கு சிதம்பரம் பதிலளிக்கையில் இதுவரை அதுபோன்று நடக்கவில்லை என்றார்.
அவர் மேலும் கூறியதாவது:
பாகிஸ்தானிலுள்ள தீவிரவாத அமைப்புகளால் இந்தியாவுக்கு மட்டுமே பாதிப்பு என்ற மேற்கத்திய நாடுகள் நினைக்கலாம்.
ஒருமுறை தீவிரவாத அமைப்புகளுக்கு அடைக்கலம் கொடுத்து பயிற்சி பெற அனுமதித்தால், அந்த அமைப்புகள் அங்கு வேரூன்றி விடும். அந்த அமைப்புகளால் இந்தியா மட்டுமல்ல; பிரிட்டனைக் கூடத் தாக்க முடியும். டென்மார்க்கைக் கூட தாக்க முடியும்.
உண்மையைச் சொல்ல வேண்டும் என்றால் எந்த ஒரு நாடும் பாதுகாப்பானது என்று சொல்ல முடியாது. இந்தியா மட்டுமே தீவிரவாதிகளின் பட்டியலில் இருக்கிறது என்று நினைத்துக் கொள்ளக்கூடாது. லஷ்கர்-இ-தொய்பா, அல்-காய்தா போன்ற சர்வதேச தீவிரவாத அமைப்புகளால் அனைத்து நாடுகளுக்குமே ஆபத்து உண்டு என்பதை நினைவில் கொள்ளவேண்டும்.
பூனாவில் நடந்த ஜெர்மன் பேக்கரி வெடிகுண்டுச் சம்பவத்தில் முன்னதாகவே தகவல் கொடுத்தும் கூட அதை தடுத்து நிறுத்த முடியவில்லை. மகாராஷ்டிர அரசுக்கு இதுதொடர்பாக மத்திய அரசின் புலனாய்வு அமைப்புகள் தகவல் கொடுத்திருந்தன.
இதைத் தொடர்ந்து ஜெர்மன் பேக்கரிக்கு 3 முறை எச்சரிக்கை விடுக்கப்பட்டது. தீவிரவாத அமைப்புகளால் பேக்கரி தாக்கப்படலாம் என்று ஜெர்மன் பேக்கரி மேலாளரைத் தொடர்புகொண்டு விழிப்புடன் இருக்குமாறு உத்தரவிட்டிருந்தோம்.
ஆனால் அவர்கள் விழிப்புடன் இல்லை. போதுமான பாதுகாப்பு ஏற்பாடுகளைஅவர்கள் செய்துகொள்ளவில்லை. இந்த சம்பவம் துரதிருஷ்டவசமானது என்று சொல்வேன்.
இந்த சம்பவம் தொடர்பாக நாடாளுமன்றத்தில் பேசும்போது இந்திய வரலாற்றில் கறைபடிந்த சம்பவம் என்று குறிப்பிட்டேன்.
பூனா குண்டுவெடிப்பு வழக்கில், பாகிஸ்தானைச் சேர்ந்த தீவிரவாத அமைப்புகள் சம்பந்தப்பட்டுள்ளதா என்பது குறித்து விசாரணை நடத்தப்பட்டு வருகிறது. சதி தீட்டப்பட்ட இடம் குறித்தும் விசாரணை நடைபெற்று வருகிறது. விசாரணை முடியும்வரை இதுகுறித்து நான் கருத்து தெரிவிக்க இயலாது என்றார் அவர்.
Leave a Reply