சென்னை, மே 16: இளைஞர்கள் நம்பிக்கையோடு உழைத்தால் வெற்றி நிச்சயம் என்று முதல்வர் கருணாநிதி கூறினார்.
உலகத் தமிழ்ச் செம்மொழி மாநாட்டு மைய நோக்கப் பாடல் குறுந்தகடு வெளியீட்டு விழா சென்னை பல்கலைக்கழகத்தில் சனிக்கிழமை நடைபெற்றது.
தமிழக முதல்வர் கருணாநிதி குறுந்தகட்டை வெளியிட, அதை இசைக் கலைஞர் எல். சுப்பிரமணியன் பெற்றுக் கொண்டார்.
விழாவில் முதல்வர் கருணாநிதி பேசியது:
ரஹ்மானுடைய இசையை நான் எழுதிய வார்த்தைகளோடு குழைத்து நீங்களெல்லாம் பருகக் கூடிய அரிய வாய்ப்பு கிடைத்துள்ளது. நான் எழுதிய பாடல் தான்.
ஆனால், தமிழகத்தினுடைய புலவர்கள், சங்க காலத்து பெருமக்கள், சங்க காலத்திற்குப் பின்னர் வந்த கடைச் சங்க காலம், இடைச் சங்க காலம் எனப் பல்வேறு காலக் கட்டங்களில் வாழ்ந்த கம்பர், காளமேகம் காலம் வரையில் எழுதப்பட்ட கவிதைகளை, அறிவுரைகளை, கொள்கைகளை, பண்பாட்டினை, தமிழர்களுடைய பழக்க வழக்கங்களை எல்லாம் ஒரு பாட்டில் அமைத்து, அதை எழுதுவது எவ்வளவு பெரிய இடர்பாடு கொண்டது என்பதை நன்கு அறிவேன்.
பாடலை எழுதும் போது அருகில் இருந்தவர்கள், இந்தப் பாடல் வெற்றிகரமான பாடலாக வர வேண்டும் என்று ஒரு பிரார்த்தனையோடு எதிர்பார்த்தார்கள். இந்தப் பாடலை எழுதும் போது ஏற்பட்ட உணர்வை நான் மட்டுமே அறிவேன்.
எனது வாழ்நாளில் 10, 12 ஆண்டுகளைத் தவிர்த்து மீதியுள்ள ஆண்டுகள் எல்லாம் தமிழ், தமிழ் என்றுதான் என் உதடுகள் உச்சரித்திருக்கின்றன.
அதனால் யார் ஒருவர் தமிழ் என்று சொன்னாலும் திரும்பிப் பார்ப்பேன், ஒன்றிக் கலந்திடுவேன், உணர்வுகளை மதிப்பேன், அதனை மதிக்கின்றவர்கள் எங்கிருந்தாலும் அவர்களை வாழ்த்துவேன்.
தரணி வாழ் கலைஞர்களின் இதயங்களில் குடிகொண்டிருக்கும் நம் வீட்டுப் பிள்ளை ஏ.ஆர்.ரஹ்மானுக்கு கிடைத்த பெருமைதான் ஆஸ்கார் விருதுகள்.
ரஹ்மானை போன்ற இளைஞர்கள் எப்படி முன்னேறினார்கள் என்பதைச் சிந்தித்துப் பார்க்க வேண்டும். அப்படிச் செய்தால் ஒவ்வொரு இளைஞனும் முன்னேற முடியும் என்ற நம்பிக்கையைப் பெற முடியும்.
ஏனெ னில், நம்பிக்கை தான் வாழ்வின் முதல் படி. அதில் கால் வைத்துவிட்டால் வெற்றி நிச்சயம்.
நம்பிக்கையோடு நான் செலுத்திய உழைப்புதான் எனது முன்னேற்றத்துக்குக் காரணம். அதே போல், ரஹ்மான் உலகப் புகழ் பெறுவதற்கு அவரது நம்பிக்கை, இடைவிடாத முயற்சிதான்.
இது யாரோ ஒரு சிலருக்கு மட்டும் அல்ல. சமுதாயத்தில் உள்ள எல்லா இளைஞர்களுக்கும் ஒரு உந்துச் சக்தியை ஏற்படுத்தக் கூடியது.
இந்த பாடல், பிறப்பொக்கும் எல்லா உயிர்க்கும் என்று தொடங்குகிறது. எல்லா உயிர்களும் பிறப்பால் ஒன்றுதான். பிறப்பு எல்லா உயிர்களுக்கும் ஒன்றேதான் என்பதுதான் அதற்கு பொருள்.
பிறந்த பின் என்ன என்பது தான் இன்றைக்கு உள்ள பிரச்னை. பிறந்த பின் எல்லோரும் ஒரே குலம், ஒரே இனம் என்ற உணர்வைப் பெற வேண்டும். எல்லாரும் ஒரே இனம் என்ற முத்திரையுடன் வாழ வேண்டும் என்ற வகையில் இந்தப் பாடல் அமைந்திருக்கிறது.
கோவை மாநாடே இந்தப் பாடலுடன்தான் ஆரம்பமாகும். இந்தப் பாடல் விளம்பரத்துக்கு பயன்படுத்தப்படும். நானே விளம்பரமாக இருந்து ஒவ்வொருவரையும் மாநாட்டுக்கு அழைக்கின்றேன் என்றார் கருணாநிதி.
அமைச்சர்கள் க. அன்பழகன், பரிதி இளம்வழுதி, தலைமைச் செயலர் கே.எஸ்.ஸ்ரீபதி, பாடகர் டி.எம்.செüந்தரராஜன், சட்டப் பேரவை உறுப்பினர் பீட்டர் அல்போன்ஸ், திரைப்பட இயக்குநர் கெüதம் மேனன் உள்ளிட்டோர் விழாவில் பங்கேற்றனர்.
செம்மொழி மாநாட்டில் 27 நாடுகளில் இருந்து 205 அறிஞர்கள் பங்கேற்பு விழாவில் முதல்வர் கருணாநிதி பேசுகையில், கோவை மாநாட்டில் இலங்கையில் இருந்து 53 அறிஞர்கள், சிங்கப்பூர் 37, மலேசியா 29, அமெரிக்கா 22, கனடா 14, இங்கிலாந்து 9, ஆஸ்திரேலியா 6, பிரான்ஸ் 5, ஜெர்மனி 5, மொரிஷியஸ் 4, பக்ரைன் 2, ஜப்பான் 2, நெதர்லாந்து 2, செüதி அரேபியா 2, சீனா, செக் குடியரசு, ஹாங்காங், இத்தாலி, நியூசிலாந்து, ஓமன், போலந்து, ரஷ்யா, செர்பியா, தென்னாப்பிரிக்கா, தென்கொரியா, ஸ்வீடன், ஐக்கிய அரபு நாடுகளில் இருந்து தலா ஒரு அறிஞர் என 27 நாடுகளில் இருந்து 205 அறிஞர்கள் பங்கேற்கவுள்ளனர் என்றார்.
ஒரே டேக்கில் கருணாநிதி
6 நிமிடங்கள் ஒடக் கூடிய மாநாட்டுப் பாடலில் சித்தன்னவாசல் வண்ண ஒவியங்கள், தஞ்சை பெரிய கோயிலின் கோபுரம், குமரியின் திருவள்ளுவர் சிலை, கடற்கரைகள், மாமல்லபுரம் கற்கோயில், திருமணமான தம்பதியை வீட்டுக்குள் வரவேற்பது, மழலைச் சிறுவர்களின் பள்ளி பாடம் கற்றல், பழமையான கல்வெட்டுகள் உள்ளிட்ட பாரம்பரிய நினைவுச் சின்னங்கள் படமாக்கப்பட்டுள்ளன.
இந்தப் பாடல் காட்சியில், 30 பாடகர்களும் தோன்றிப் பாடுவது போல் படமாக்கப்பட்டுள்ளது.
“பத்தாவது படத்தை இயக்க உள்ள நிலையில் இந்த செம்மொழி மாநாட்டுப் பாடலை இயக்கியுள்ளேன். டி.எம்.சௌந்தராஜன் முதல் ஸ்ருதிஹாசன் வரை மூன்று தலைமுறைகளைச் சேர்ந்தவர்ளை பாட வைத்ததற்கு ரஹ்மான்தான் காரணம். இந்த பாடலில் முதல்வர் கருணாநிதிக்கும் ஸ்டார்ட், கேமிரா, ஆக்ஷன் சொல்லிவிட்டேன். சினிமாவில் ஒன் டேக் ஆக்டர்ஸ் நிறைய பேர் இருக்கிறார்கள். ஸ்டார்ட், கேமிரா, ஆக்ஷன் என்றதும் அவரும் ஒரே டேக்கில் நடித்து முடித்து விட்டார்’ என குறிப்பிட்டார் மாநாட்டுப் பாடலை இயக்கியுள்ள கௌதம் மேனன்.
மாநாட் டுப் பாடலை முதல் முறை திரையிட்ட பின், அரங்கில் இருந்தவர்கள் ஒன்ஸ் மோர் கேட்க இரண்டாவது முறையும் பாடல் திரையிடப்பட்டது.
Leave a Reply